星期日有馬跑，馬主P叫左丁山入場，佢隻團體馬去季最後一天以五十二倍大冷門姿態跑第三，冠亞軍係「陽光」、「御名燈」，你哋都知係幾高水準嘅馬。今季出三次，兩次跑第三，馬主P有啲氣結，但練馬師話隻馬宜向更長路程發展，今趟唔跑千二米，改跑千四米，可能更啱跑，於是馬主P滿懷希望，叫左丁山注意吓，其實唔使佢叫，自己都會入場嘅啦，既然講到出口，一於昅實。
點知馬主N打電話嚟，叫左丁山於星期日上午到屯門公眾騎術學校（屯門龍門路地段四十五號）參觀騎術表演。咦，唔好阻頭阻勢噃，去完屯門再入沙田馬場，好頻撲啫。馬主N話二○○八年殘疾人奧運會騎術（ParalympicsEquestrian）賽在香港舉行，香港好彩已確定有一位參賽代表葉少康，希望繼續有其他代表爭取到參賽資格。十月十五日星期日上午九點，就有葉少康示範表演嘞，想知道呢位英俊小生嘅馬上英姿，最好到場參觀。何況，據馬主N介紹，同場仲有兩位金牌得主，就係○四年雅典殘疾人奧運會騎術金牌得主LeePearson與DebbieCriddle，一男一女，必令人大開眼界。
殘疾人士騎馬，需要極大勇氣與毅力。呢位LeePearson贏過六面奧運金牌，五次世界冠軍及一次全英公開賽（與健全常人一起比賽）冠軍，佢自細患上arthrogryposismultiplexcongenita（先天性多組關節強硬症），六歲時已做過十五次手術，一九八○年戴卓爾夫人孭佢走入唐寧街十號領取一九八○勇敢兒童獎。另一位Debbie喺一九八五年遇上意外，手臂癱瘓，大腿嚴重受傷。佢兩位與葉少康點樣克服先天後天嘅肢體傷殘，騎上馬背，爭取世界榮譽呢？佢哋騎馬示範之後，會同記者見面，每個星期日早上九時，左丁山仍然未肯瞓醒，（特別係睇完英超大戰之後），咁早就去到屯門，難度甚高，馬主N話左丁山如果肯晨早起身趕去屯門，佢會有三隻頭馬機會提供咁話。