工行（1398）下星期一招股，而另外2隻新股力勁（558）同埋金界（3918）就會相繼喺下星期掛牌，新股熱除咗攞表抽新股之外，呢輪上咗市嘅新股表現都好神勇，例如海油化學（3983）掛牌第1日只係收2.26元，經過2個星期時間，噚日最高升到去2.78元，升幅23%，抽唔中等上市至買，都可以賺咁多。
其他新股當中，瑞安房地產（272）上市前受到社保基金貸款傳聞影響，好多人都唔睇好佢嘅上市後表現，但係點知掛牌頭2日都升，表現已經令到好多人大跌眼鏡。
另1隻好多人講嘅新股係京客隆（8245），上市頭1日表現夠晒驚嚇，開出6.25元後直插至5.50元收市，如果開市價買，即輸0.75元。但係呢隻「驚嚇股」橫行咗幾日收齊貨之後，上星期四開始連升6日，噚日最高升至6.74元先至掉頭回落，如果夠膽掛牌第1日收市價5.50元買，以噚日收市價6.52元沽，都賺近2成。
背景夠特別
市場最新講緊有得炒嘅新股，係隻盛高置地（337），呢間公司雖然都係上海房地產發展商，但係大股東係外資，喺澳洲新南威爾士嘅Starwaly房產集團，之前個名叫上海浦東康橋集團，上市前改名為盛高置地，據講以康橋為品牌之樓盤好出名，問問上海人就知。作為首間香港上市嘅外資國內房地產商，點計都特別啲。
歐陽風