律政司司長黃仁龍講法律就叻，噚日出席首屆「活出彩虹」大中華口足畫匯藝坊，見到班失去雙手但仍然用口繪到靚畫嘅畫家，就真係見醜嘞。
話說佢要同中國畫家王永春合作一幅水墨畫，佢就面有難色咁，畫咗兩個類似「小」字或兩堆竹葉嘅兩不像物體，接手嘅王永春就真係畫咗棵竹樹出嚟，叫做「竹報平安」，仲送畀仁龍做見面禮。
黃仁龍有啲尷尬咁話冇學過畫，八方就追問佢兩個女會唔會學？佢就答「會嘅」；之後就轉咗話題，話班畫家嘅經歷其實係香港年輕人好好嘅借鏡，唔應該自怨自艾，要去鍛煉更強嘅意志力。八方聽畢，覺得熟口熟面，仁龍仔細個嗰陣咪又係幫爸爸賣雪糕同搬汽水大，所以佢見到班畫家就感同身受嘞。