堪稱為「古裝版《MetalGear》」嘅忍者潛入任務遊戲《天誅》系列，唔經唔覺推出咗成八年，幾乎每部主機都留低過足迹。今次登陸XB360，當然唔會齋出單機移植版畀人玩，而係重點透過Live等大家可以互相合作，你劈前時我殿後，兼且任你整啲搞鬼造型嚟開片，將儆惡懲奸嘅使命發揮至極限！
文：陳福榮
隱密指數趨複雜
以前《天誅》只要不被敵人正面發現同移動時發出聲響，否則會俾守衞甚至門口狗聽到。到呢集，潛入時被人發現嘅機會將大幅增加，為咗避開敵人「聽覺」，行嗰陣要小心翼翼，仲唔可以亂咁掹刀，否則肯定俾人聽到；「嗅覺」係指包括犬隻等嘅動物，會聞到你身上殺人時濺落衫嘅血腥味，如果搵唔到條河浸下身就真係水洗都唔清！仲有勁似《SplinterCell》嘅「光影指數」，即係匿埋黑影度守候殺人良機。估唔到今時今日做忍者要兼顧咁多麻煩嘢。
自訂主角自由度大
今次呢隻《天誅千亂》由於出喺XB360，唔大玩連線合作又真係好嘥料，因此廠方專登畀大家好似MMORPG咁自行設計角色，型仔索女甚至大嚿佬任你選擇，配搭用嘅服裝同飾物仲多不勝數，上到網就唔會每個人都一樣樣啦。而除咗純粹嘅外觀唔同之外，玩家仲可因應個人需要而自行調校體、力、速嘅數值比例，想斬人大力啲或者着草快啲悉隨尊便。唔計固定嘅故事，可透過Live進行全部36個不同任務，唔單止似足《Rainbow6》咁畀你打手勢下達指令示意「Go!」定係「Wait!」，亦能夠用咪高峯同成班Friend多多溝通，咁樣玩起嚟就絕對夠Feel啦。
冧友招數夠晒多
唔知係咪因唔再係由力丸同彩女擔正做主角，俾大家整啲角色出嚟係咁舞有關，原本係玩隱密殺敵嘅《天誅》𠵱家居然有成幾十種行刑手段，唔再就咁鋸頸放血，確係令人有點兒費解。先講今集強調嘅「臨兵鬥者」Icon，以前想「忍殺」敵人，只要唔畀佢發現，就咁行埋去按掣就得。如今變成先要喺指定範圍之內守候，等你頭頂出現個紅色九字印先可「忍殺」，否則只會係普通斬擊，失手後將非常麻煩。另外新增嘅「忍殺」唔止從後撲過去咁簡單，仲有連門都斬得爛嘅「越過障子忍殺」、企喺轉角吼住盲點嘅「依靠牆壁忍殺」、從上而下跳落去嘅「墮下忍殺」以及爬喺天花板將敵人釣魚咁釣上嚟嘅「天井張付忍殺」等，仲有大量新增招式，講真逐一招式都有排你試。
忍者三大招數
特典未夠吸引
相比起其他遊戲附送嘅初回贈品，《天誅千亂》喺日本附送嘅係最速初心攻略本《忍術皆傳之書》，裏面圖文並茂講晒百幾種忍者動作，同埋每種一擊必殺嘅方式，假如未玩過呢個系列，本書的確幾實用。不過《天誅》始終唔係一般動作玩法，講求潛入殺敵耐性，早就成為針對Fans而設，因此如果佢肯贈送靚靚Figure咁就吸引人買好多囉！
PROFILE
遊戲類型：動作
對應機種：XB360
遊玩人數：1至4人
開發廠商：FromSoftware
售價：約$378
售賣點：I-Gamer（27253338）
地址：深水埗福華街福仁商場G16號舖
