商業電台創辦人何佐芝嘅夫人馮月燕女士，上個月底喺跑馬地養和醫院過身，享年80多歲，何家一向低調，今次喪事籌辦亦貫切作風，喪禮原來喺上個禮拜六中秋節翌日，靜悄悄喺歌連臣角禮堂舉行，家人噚日喺幾份報章上刊登訃聞，消息先至曝光。
何家喺訃聞內形容，何夫人一生相夫教子，賢良淑德，家人永遠懷念佢。熟識何夫人嘅朋友形容，何夫人好友善好social，而且熱心公益，出錢出力，過去30多年喺香港紅十字會做義工，早年仲成立咗一個「何馮月燕基金獎學金」，推動本地教育事業。
美國土生土長嘅何夫人，自幼講得一口流利英語，但熱愛中國文化，平日鍾意穿着旗袍。佢同何佐芝結婚超過60年，育有一子一女，兒子係現時商台主席何驥。
據商台員工透露，何夫人近年好少去商台探班，除咗一班開國老臣子對佢有印象，大部份員工對何夫人唔太熟識；今次商台亦冇特別為何夫人舉行悼念活動。
老伴仙遊，相信對87歲嘅何佐芝嚟講係一個唔細嘅打擊。何佐芝係富甲一方嘅已故慈善家何東的私生子，佢喺1959年8月創辦咗商業電台，但近年已經甚少理事，將業務統統交晒畀個仔打理。