在奧尼爾執教下，阿士東維拉至今依然不敗。之前分別作客阿仙奴及車路士，均可得1分而回，果真厲害！
其實隊波咁掂，真係不得不讚領隊作出針對性嘅部署。其實人腳同上屆冇乜唔同，鋒線用上安祖、巴路士搭艾邦拉荷，從上季38場入42球可見，若果唔買入更高質素前鋒，根本冇條件同對手鬥攻。所以奧尼爾決心從防守做起，維拉4人防線堪稱現時英超最佳，開「咧」至今7場，未有1支隊伍可從維拉防線上兩度破網，3次主場出賽更只失1球，表現夠晒硬淨。
相反，另一隊今屆大幅動作嘅熱刺，現正處於水深火熱中。7場聯賽居然有5場食白果！上仗對樸茨茅夫，有球12碼仲要係靠索高拿做戲呃返嚟，唔係點會𠵱家先累積到4個入波呀！今場作客維拉，過去12季只曾1勝，近7季更加係全部開「細」，似乎熱刺都要再食多餐腐竹白果糖水，頂住肚先啦！
曼聯近6場5開「細」
另外，近6場有5場開「細」嘅曼聯，作客到喺主場只失過1球嘅韋根，相信個「細」都會持續。朗尼周中代表英格蘭時仍未見有狀態，前線單靠沙夏唔易發圍。呢場波買入球「細」有1.8倍，好過揀邊隊輸贏。
強尼
有線球彩台主持
電郵：[email protected]