黑色星期五港股承接美股創新高升勢，一開市已經升穿萬八點關，恒指最高18067，期指最高見18095，本來氣勢如虹，但係下午獲利沽壓相當之大，除咗地產股由高位回落變成倒跌之外，期指都由高位跌成百點，由周四收市高水74點，縮窄到只係高水10點。
噚晚唔知美股遇着黑色星期五會點，可能係尾市沽壓咁大嘅原因，其實個市收唔收得到萬八樓上，象徵意義大過實際，歷史高位18397呢個位升唔升得穿，技術上意義更加大。
工行（1398）下周一招股，呢兩日資金炒埋建行（939）同中行（3988），如果係純炒落後，噚日兩股都呈高開低收，似乎難搞些少，但係如果係大行為咗工行招股造勢，下個禮拜可能會炒多一轉，尤其係建行，成交額接近50億元，咁大成交一定有古怪。
倉內太古A（019）升1.10元，以85.15元全日高位報收，成交亦都明顯增加，睇圖表剛裂口升穿旗形阻力破位，睇嚟下個星期有機會突破85.40元，再創新高，其實噚日尾市期指回得咁急，太A完全唔受影響，已經係一個強勢訊號。
聯康沽出止賺
另倉內原本仍錄得超過4成利潤嘅聯康生物（690）噚日跌穿3.60元橫行區支持後，曾急跌至3.20元，收市3.40元，跌7.8%，已於3.40元沽出止賺，至於富豪酒店（078）分拆REIT在即，升0.01元，會堅持揸到實，除非技術走勢突然轉差。
趙飛雲