被周刊拍到同北姑打網球、兼拖晒手行街街嘅城大常務副校長、有「城大謝賢」之稱嘅唐叔賢，死口唔認包二奶。城大學生會會長李駿鋒前日約見咗暫時做緊署理校長嘅唐叔賢，大家見面半個鐘，相信好可能創咗學界先河，由學生當面質問署理校長嘅私生活。
結果係，雖然周刊人贓並獲、圖文並茂，但唐死撐話自己無辜、無偷食。李駿鋒就話呢件事事態嚴重，都係要等校長張信剛出完差返香港，再問清楚唐叔賢，先作結論。
不過，佢就好老實講，若果呢單緋聞屬實，而又有損大學聲譽，唐叔賢繼續做副校長都好有問題。唔知唐副校長呢排會唔會繼續打網球呢？