入秋，令我諗起暖笠笠煲仔菜。喫煲仔菜無理由坐冷氣房，吹住把殘舊牛角扇、聽住嘈到坼天嘅猜枚聲、隊番支冰凍啤酒……咁踎大牌檔至夠風味。風味有嘞，味道點先？又金菇肥牛煲？又粉絲雜菜煲？No！No！No！好味極都會嫌悶。今日介紹出位煲仔菜，好聽啲叫Fusion，唔好聽叫九唔搭八，不過懶理好聽唔好聽，味蕾無詐型就得喇，係咪咁講先？
記者：區佩嫦
攝影：楊錦文
模特兒：炳權、家健、Carl、See、Kayu、Crystal、Vicki
每季推出40款煲仔菜
「勝利菜館」開業22年，靠潮州菜、家常小炒、煲仔菜起家，老闆、廚師同員工份屬自己友，同聲同氣一條心。佢哋無嘢叻，最叻搞新意思，久唔久就創作出新菜式，老闆呂先生話：「以前機場未搬，生意真係好好，搬走咗之後，生意跌咗好多……無嘢㗎，惟有諗多啲新意囉，希望吸引番多啲邨外人幫襯囉。」大廚的確諗頭多多，睇餐牌已經有成30款唔同煲仔菜，仲未計每季推出嘅新搞作。「香港人愈食愈嘴刁，普通煲仔菜已經無晒吸引力，要經常推出一啲時令菜，愈搞鬼就愈吸引。今次嘅菜式我哋都諗咗好耐，再凍啲我哋又會推出番啲臘味、栗子煲，咁每季都會有成40款煲仔菜畀客人揀，保持到新鮮感咁囉。」由於款式多，價錢唔算貴幾十蚊有交易，影相短短兩粒鐘，已經聽到呂先生不停左指右指：「呢個客幫襯我廿幾年啦，嗰個客搬走咗都專登揸車返嚟捧我場。」嘩！個個都係老街坊，個個都讚口不絕，有無咁誇呀？初時都有懷疑，不過試完菜發覺真係勁好味，再感受埋現場喧鬧氣氛，大酒樓喎，大酒店喎，邊有呢度咁好Feel吖？
茄子雙魚煲$48
叫得雙魚煲梗係有兩位魚主角，師傅用咗三文魚頭加鯇魚尾，一中一西一頭一尾大玩Crossover。有人話熟食三文魚會腥，No喇，魚肉走油後超嫩滑，配合香濃麵豉醬汁，聞落已經香噴噴，無吹水，食到簡直停唔到口。
a.滋補海陸空煲$98
秋風起，又係時候補一補，師傅特別用水魚、乳鴿同肥牛炮製出呢個滋陰養顏海陸空煲。師傅話：「水魚滋陰補腎、乳鴿化痰止咳，加埋淮山、杞子、紅棗熬出嚟嘅湯底，最啱女人補。」一鑊熟煲仔上菜，得，打邊爐自己慢慢烚，都得。
b.啫啫雞鮑片煲$48
大眾化啫啫雞煲一加鮑片，感覺零舍唔同，聽個菜名都矜貴啲吖。師傅用肥美嫩滑見稱嘅黃油雞，加鮑片一齊燜，燜得比一般啫啫雞煲亁身，但醬汁包住每件雞塊同鮑片，香濃夠味，一件雞一塊鮑片再一啖啤酒，正到爆。
c.雪菇七友煲$38
師傅用雞髀菇、秀珍菇、鮮冬菇、蘑菇、鮑魚菇、金菇同牛尾菇七種菇菌，加豆腐、雪菜用魚湯煲製，齋用雪菜吊味已經勁入味，甜到簡直可以當湯飲。
d.北菇鴛鴦掌煲$40
燜鴨掌好普通，加埋鳳爪雙掌齊下就真係好少見！師傅話：「用有骨鴨掌同無骨鳳爪，加頭抽燜足45分鐘，咁啲鳳爪和鴨掌先會入味。頭抽無味精，更加突出到孖掌鮮味。」唔只鮮，咬落仲好爽口，滑到可以自動跣入喉嚨。
e.椒鹽生蠔煲$55
椒鹽鴨舌、椒鹽鮮魷就聽得多，椒鹽生蠔就真係未試過。師傅用流浮山生蠔，唔算好大隻，不過好鮮，先將生蠔出水，再點脆漿粉炸，最後加椒鹽兜勻，打開蓋即時傳來啫啫聲，全場都聞到嗰陣椒鹽香味。
食客有Say
搵食攻略
勝利菜館（27550868）
地址：九龍灣啓業邨熟食中心7號檔
交通：九龍灣地鐵站乘51M小巴直達
營業時間：周一至周六11:00am-2:00pm、6:00pm-1:30am，周日及公眾假期6:00pm-1:30am
座位：約200個
平均消費：午餐$20、晚餐$40
有着數：午市設$20三餸套餐（連白飯及例湯）
最好賣：啫啫鮑片雞煲、泰式咖喱蟹煲，平日每日賣50個煲仔菜，假日賣到200個
