民間電台8月先俾警方以非法佔用廣播頻道查封，佢哋噚晚又再廣播，不過一樣俾電訊管理局同警方昅實，廣播無幾耐，成班電訊管理局人員同警察立即喺7點幾衝上去佢哋喺柴灣康民工業中心嘅辦公室拉人封舖，要佢哋終止廣播。電台負責人阿牛曾健成梗係同班人理論，但係都冇用，警察除咗攞走辦公室入面嘅器材，仲帶走埋阿牛同梁國雄返警署助查，老牛一路俾警察帶走，仲一路叫口號，要求開放大氣電波，老牛話香港法例落後，外國一早有民間電台，公眾可以自由用大氣電波，係香港仲限制公眾用大氣電波廣播，打壓言論自由。