股市噚日又創新高，但有股民就斯人獨憔悴，過咗咁多年仍然念念不忘仙股事件之痛，繼續向煲呔投訴財經事務及庫務局局長馬時亨。噚日煲呔落區聽施政報告，有地區人士投訴，啲官員亂噏嘢就搞到啲仙股股價跌晒！講講吓施政報告，無端端講仙股真係九唔搭八，煲呔回應就叫大家小心啲，投資梗有風險喎。
煲呔前兩日話，為咗睇到普選，千祈唔好喺街跌死。有一個阿婆就趁機勸煲呔，咁就千祈唔好去荃灣區巡區，因為啲街道好差，市民就行慣晒，但煲呔落嚟實仆親。煲呔即場叫荃灣區個DO巡晒啲街，仲話一定要親自落嚟睇。
啱啱發表完第二份施政報告嘅煲呔，呢幾日四圍出席答問大會同落區解畫，俾人質到氣都咳，但唔知係咪要展現強政勵治嘅本色，煲呔好似同自己過唔去，明知聽日係主日，都唔聽天主話休息去崇拜，寧願丟低一池心愛嘅錦鯉，匆匆忙忙趕去廣州，出席第100屆「中國出口商品交易會」嘅揭幕禮，後日又要趕返香港開工。其實呢類交易會，內地一年都唔知搞幾多，煲呔咁搏命，唔通係想向班內地高幹攞着數，等爭取連任選票時又有多啲籌碼？