今年無綫台慶女主角大熱佘詩曼在下月推出的台慶劇《東方之珠》中飾演一名黐脷筋鄉下妹，正好為其獲提名的《火舞黃沙》和《鳳凰四重奏》兩劇催谷人氣，與孭飛演另一台慶劇《肥田囍事》兼同為女主角大熱的胡杏兒展開廝殺，對於會否希望奪獎，阿佘說：「話唔想就呃你。」
入行9年的佘詩曼雖然拍劇無數，但一直與無綫台慶頒獎禮的最佳女主角獎無緣，今年她再接再厲，挾主演的《火舞黃沙》及《鳳凰四重奏》兩劇優勢，再與一眾女藝員在台慶頒獎禮爭大獎。
得獎只當是鼓勵
今年女主角大熱除阿佘之外，還有入行已7年、增磅拍《肥田囍事》的胡杏兒及《女人唔易做》的鄧萃雯，由於後者非包薪藝員，相信得獎機會渺茫，加上佘詩曼和胡杏兒的新劇均在台慶月播出，牌面上應屬阿佘和胡杏兒之爭。
談到是否渴望捧獎時，阿佘前日在電話中說：「話唔想就呃你，好多嘢都好想㗎，係咪想就有呢？唔係。大家鍾意睇、收視好，其實已經好開心。攞獎就梗係開心，但我好enjoy拍攝過程，我入TVB係因為鍾意拍戲，唔係為攞獎，獎項係一個鼓勵、bonus。」
胡杏兒人氣爆燈，描述肥女奮鬥史的《肥》劇噱頭十足，但原來阿佘在《東》劇中的角色也十分有睇頭，扮演黐脷筋鄉下妹的她出城後努力向上，終於成為名歌星，雖然此劇未能趕及今年台慶提名，不過也能為阿佘造勢，催谷人氣。
黐脷筋變咬脷筋
阿佘笑言因拍劇而經常不慎咬脷，她說：「我個人唔係黐脷筋㗎嘛，其實個歌女角色都幾可愛，係個儍大姐，拍時都要有啲技巧，都試過咬到自己條脷。」問阿佘對雯女和杏兒兩位勁敵有何評價？她說：「對手就年年都咁強，播《女人唔易做》時我開緊工，冇睇過，相信套劇收視咁高，都係好嘢嚟嘅。《肥田》未出畀唔到意見。」
採訪：朱倬誼
攝影：仇志德
服裝：SistyrMoon
