每星期敷4晚美白Mask，剩低兩晚做美白Facial，枕邊人都無覺得你白淨咗？唉，算罷喇，你無「MoBar」侍應Esther咁天生麗質，敷乜敷物盞嘥氣喇，佢笑住話：「客人成日都讚我皮膚白，問我係咪成日做Facial。」咁你有無做Facial？「無㗎，淨係有次試過公司Spa提供嘅療程，幾舒服咁囉。我皮膚一向都咁白，有同事話我白到似北方人，其實我想自己黑啲，太白好似病人。」嘩，咁講好風涼啫，講真佢皮膚絕對唔係病壞嗰種蒼白，係白裏透紅，係咪化咗妝先？「返工唔一定要化妝，最緊要整齊啫，不過公司有個好細心嘅安排，每日都有專業髮型師幫我哋Set頭，所以每個同事嘅髮型都好Trendy，做嘢精神啲，客人見到都開心啲啦。」俾客讚得多嘞，男同事又有無讚你先？「男同事好有風度，有時早餐要拎好重嘅熱爐，男同事都會自動自覺幫手，不過我估又唔係因為我靚先幫手嘅，呢啲係男士應有風度嚟㗎嘛。」男士應份有風度？未必喇，你唔靚唔白，鬼畀風度你咩？
記者：黃若茵
攝影：周旭文
RawYellowFinTuna
越式小食，用米紙包住牛油果、甘笋、生吞拿魚、大葱一嘢質入口，爽到嗦嗦聲，點埋個酸味開胃醬汁，好清新。
LMFish&Chips
LM即Lime，脆漿帶強烈日本天婦羅味道，記得唧啲青檸汁食，咬落無咁油膩唔會成口粉。
（左）MoTox （右）RedChamer
混合薑汁、菠蘿汁、蘋果汁加鮮薄荷葉就係MoTox，味道好Fresh；RedChamer酒味較濃，因為成份有荔枝酒、香檳同烈酒。
食客評分（5分滿分）
Arthur：「淨係服務態度已經攞滿分啦，何況有甜美笑容。」
Sasche：「Esther做嘢好勤快，我有讚無彈，畀滿分。」
MoBar（21320077）
地址：中環皇后大道中15號置地文華東方酒店地下