何韻詩不知不覺入行10年，自從師傅梅艷芳過世後，她對於未能在對方生前爭取時間好好相處而感到遺憾，決意要在適當時候向身邊人訴說感激之情。10年努力，除了事業的得着，也領悟了處世之道。
何韻詩月底將於紅館舉行個唱，她早前接受本報訪問，談到在娛圈步向紅館舞台的10年光景，待人處事的態度都有所改變，EQ提升了之餘，還懂得對身邊人表達謝意，阿詩說：「以前以為心照，原來感激係要喺適當時候表達出嚟，𠵱家我完成一個project，或者喺頒獎禮後，都會同家人或助手擁抱。」
釋放感情
這個體會，原來來自師傅梅艷芳，阿詩說：「我份人好少後悔，或者諗如果當初唔係咁就好。不過我好遺憾我師傅走之前，冇爭取時間好好咁同佢相處，我羞於表達自己嘅感覺，冇盡情向佢表達。所以之後我有好大轉變，發覺即使好老套都要去講，向關心我嘅人表達，我上年就將呢啲感情釋放晒出嚟。」
阿詩自言對感情十分投入：「我以前試過對感情太投入，令對方唞唔到氣，我覺得鍾意人，投入有乜唔啱？無論工作定生活，我覺得啱就去做，只要唔影響人，成功與否都係自己受。經歷過咁多事後，明白咁樣投入唔係愛，其實係好自私，呢幾年終於知道自己任性，有需要改善，咪慢慢改囉。」
採訪：蔡如玉 攝影：陳偉權
場地提供：都會海逸酒店
