立法會噚日好熱鬧，除咗有煲呔答問大會，各個委員會亦要舉行正、副主席選舉。由於好多黨派都有協調過，基本上都係做個樣出嚟選吓，即係正、副主席調吓位就ok喇，但當中都有啲驚險鏡頭，例如蔡菜子差啲因為失魂唔見咗貓紙，令何俊仁差啲要代涂謹申做咗保安事務委員會副主席。
事緣保安Panel噚日選主席時，民建聯劉江華按照劇本，成功由副主席搖身一變成為主席。但係到咗選副主席時，蔡菜子就忽然提名民主黨何俊仁，搞到全場嘩然。點解？事關根據佢哋協調後嘅結果，新一屆應該係由涂謹申做副主席㗎喎，唔通蔡菜子同阿涂有仇，死都唔肯提名佢？
仁哥聽到有人提名佢，自然一臉茫然，即時話唔係自己做喎，仲即時請蔡菜子食檸檬話唔接受提名。喺呢個時候，蔡菜子先知自己搞出個大頭佛，摷番張協調貓紙出嚟，仲用笑遮醜，笑到唔停得口。好彩，最終阿涂都有被提名兼選中，否則佢實嬲死蔡菜子。
曾鈺成為做局長留力？
不過，要數戰情最激烈嘅Panel主席選舉，首推規劃地政Panel。事關泛聯盟劉秀成一早放風，話根據各大黨派嘅協調機制，今個年度應該由佢做主席，擺明硬撼自由黨劉皇發。但八方之前都講過，好多黨派都話呢個會協調唔成功，邊個有實力就去選，唔係泛聯盟講嘅有君子協定咁話。
發叔噚日當然繼續出選，佢呢位老臣子仲得到民建聯支持，戰果唔使選都好明顯。所以劉教授最終臨陣退縮，話泛聯盟誤會咗呢個位都有協調，先至諗住選吓；既然發叔去，自己選番副主席就得喇。發叔最終以17對6嘅大熱姿態，擊敗泛民嘅大嚿冧莊。一場茶杯裏的風波，就喺好兒戲嘅情況下落幕。
至於政制Panel，依然出現泛民單挑親政府陣營嘅戰況。今次代表泛民出戰嘅，就係夠票就去選特首嘅公民黨梁家傑。可惜吖，對方陣營人多勢眾，梁大狀明知不可為而為之，雖然最終得泛民八票，但勝在勇氣可嘉，所以咁樣輸咗比泛聯盟呂明華都算雖敗猶榮。副主席呢，就由民建聯副主席譚耀宗當選，接替本來應該輪到做副主席嘅曾鈺成，莫非曾生一如傳聞咁諗緊去做局長，要留啲時間做好準備工夫？