出道至今一直保持鄰家女孩形象的吳日言，近日在新歌《HappyHour》的MV大變身，她自爆向台灣人氣歌手蔡依林偷師，並以性感打扮，配上誘人動作，希望以火辣舞步一新歌迷耳目。
吳日言（Yan）近日拍攝新歌《HappyHour》MV，她一改男仔頭形象，換上超短裙配魚網絲襪和兩吋高踭鞋，大騷美腿，實行以艷女的形象令歌迷眼前一亮。
但求似樣
阿Yan在MV中大騷舞藝，除了演繹自摸外，還不時扭動腰肢，意態撩人。排舞期間，更參考了韓國人氣歌手BoA和台灣天后蔡依林的舞步，但她自問水準未達跳舞歌手。
問阿Yan會否仿效蔡依林行性感歌手路線？她說：「我冇蔡依林咁好身材同身手，我但求跳得似模似樣，希望帶畀觀眾唔同感覺就好開心，我自問一啲都唔性感。」
阿Yan表示演繹時最難是擺出誘人甫士，她說：「好似要做自摸動作，我雖然着住衫，但喺工作人員面前做真係好尷尬。」她最初未能掌握動作，被同事取笑太粗魯，沒有溫柔感覺，但經過排舞老師的指導和示範後，她逐漸投入，更成為鏡頭前的性感尤物。
曾在森美小儀歌劇團與阿Yan合作過的EO2成員Otto負責排舞，Otto說：「如果唔係熟，我唔會幫人排舞。阿Yan每次排舞都係拍完劇嚟，雖然唔夠精神同活力，但仍然好專心去學。」
性格分裂
此外，阿Yan又自嘲舞步似扭毛巾，她說：「我又成日跳到甩肺，我成日話呢隻係甩肺舞。」她排舞期間要兼顧拍無綫劇集《學警出更》，拍劇時扮警察步操，排舞時又變回女人，阿Yan笑言自己性格分裂，要慢慢調校才能回復正常。
撰文：比華利
