1941年12月，日本皇軍命令佢最大規模嘅聯合艦隊離開廣島海軍總基地，將艦隊駛去夏威夷群島，途中仲要艦隊中嘅船隻，例如航空母艦、戰艦、補給艦等等，唔可以有任何無線電通訊（radiosilence）。去到1941年12月7日清晨，艦隊就派轟炸機用魚雷襲擊泊喺珍珠港嘅花旗國太平洋艦隊。
聯合艦隊船上嘅水手、機師、廚師等等都已經接受過多月嘅訓練，知道將艦隊駛去夏威夷群島嘅原因係想襲擊位於夏威夷珍珠港，花旗國太平洋艦隊總部。雖然，有咁多人知道要襲擊珍珠港，日本皇軍仲可以喺花旗國意料之外，突襲珍珠港，差唔多完全擊沉花旗國嘅太平洋艦隊。
大家可能會問：「點解今日孫柏文用隻金手指為大家篤一宗軍事歷史呢？」其實，今日同大家重溫偷襲珍珠港呢段歷史，係想同大家傾有關一班人進行「突襲」嘅時候，必須要有嘅「口密紀律」。
前日喺花旗國，美洲銀行BankofAmerica突然宣布為所有股票戶口只需要有2.5萬美元資產以上嘅客戶，提供無限免費網上買賣股票。消息一出，所有經營網上股票買賣，例如e*trade、嘉信理財CharlesSchwab、TDAmeritrade等等嘅經紀行，一開市就跌5%至10%不等。孫柏文今日要評論呢件事，係因為我覺得呢件事好神奇，最神奇嘅居然有一間銀行股票經紀部可以喺全金融業當中最八卦，最鍾意交換情報嘅經紀業，成功策劃一次完全冇外人預先知道嘅「突襲」。
全球經紀行玩完
股票市場人士有個詞叫做「春江鴨活動」，點解？皆因「春江水暖鴨先知」，「春江鴨活動」等如有人知道會有影響股價嘅事就快發生，買定賣定股票去賺錢。大家可能會問：「呢啲唔係叫內幕交易咩？」其實都算係，不過法律上如果有一間公司A做動作，可能會影響到完全獨立於公司A嘅公司B盈利，就算有預先買賣公司B嘅證據，都未必能裁定為有罪。所以，好多時候喺有影響公司股價嘅消息出之前，股價已經開始郁。好似諾貝爾經濟學獎得主佛利民先生話齋，好多時候股價反映嘅現實，比起大家可能已經接受嘅「現實」為準。
今時今日，通訊發達，基本上冇乜襲擊可以喺全場完全意料之外「突襲」成功。就算近年最出名嘅「突襲」，阿蓋達AlQaeda喺2001年9月11日襲擊世貿大廈，如果大家有機會睇番當時被「借用」飛機嘅兩家航空公司，聯合航空United同埋AmericanAirlines控股公司嘅股價變動，喺9月11日之前幾個交易日，已經喺冇乜特別新聞、消息嘅情況之下，明顯地向下跌。當日已經有人猜測，有人知道911將會發生，所以進行「春江鴨活動」去賺錢。
如果猜測屬實，就等如就連阿蓋達都冇嘅「口密紀律」，美洲銀行反而有，孫柏文今次都要寫個「服」字，高呼一句：「BankofAmericaBrokers，Bravo！」最後，我唔知依靠收股票交易佣金嘅日子是否過去，不過純經紀行受大銀行股票部壓迫就一定係全球趨勢。係花旗國，都仲有好多唔同類型、獨立經營、互相競爭嘅交易所可以畀空間經紀行證明畀客戶睇自己嘅存在價值，不過我哋特區政府就好似個白癡咁，四個交易所合併為一之後，都繼續畀佢獨市經營，唔死經紀行，死邊個？