提起林麥（915），好多人都記得佢有「小利豐」（494）之稱；但係揸咗林麥嘅小股東，諗起呢個稱號就只識得苦笑。淨係睇今年嘅表現，利豐今年一月由12.95元低位起步，噚日收報19.96元，累升54%；林麥喺同期由2.275元高位陰啲陰啲跌，噚日收市價1蚊，冇咗56%，小股東真係愈揸愈傷心。
成交急增惹憧憬
噚日隻股彈番3仙，成交有成21球，係03年中以來最大嘅單日成交量，相對過去一個月，每日成交得嗰幾十萬股至一兩球，表現甚為矚目。難怪開始有網民對佢有幻想。
喺《Yahoo討論區》內，網友kammakkay問：「$1.00入博反彈，有沒有chance？」
clarksonhk比較樂觀：「有chance。谷底整固，開始回升。」
94167就相對謹慎：「林麥𠵱家係業績未有大改善，爆極唔上，唔等錢使，1元入貨抵玩！」
林麥係一站式環球供應鏈管理解決方案供應商，截至今年4月止年度，純利倒退29.2%；截至7月，首季盈利又大跌41.4%，嚇走唔少捧場客。不過，花旗7月中發表報告，指現時成衣業不景氣，林麥較難靠旗下業務自然增長，集團已完成重組及引入新管理層以扭轉業務，未來需進一步收購，以令其產品、顧客及地域更多元化，預期部份成果可於07年度業績上反映，08年度則可見全面效應。
林麥股價𠵱家貼近01年中以嚟低位，已反映不利因素，可以重新留意。技術上，MACD四底背馳，RSI三底背馳，再跌空間有限，短線博上番1.20元，跌穿0.96元止蝕。
余文