好多女仔嫌TouchScreen手機太過「隆重」，唔敢拎出嚟用，不過韓國SAMSUNG就只係在機面上稍加點綴，已經令整部手機滿載少女味！講緊嘅係SAMSUNGE898，佢好巧妙咁將機身「壓平」，令厚度等同於一塊化妝鏡咁纖薄，同時更將Stylus粉飾為一支唇膏筆，靚鏡搭唇槍，女性玩家又點捨得嫌棄？
記者、攝影：陳國輝
電話繩變唇膏筆
自從三星推出UltraSlim系列以嚟，已經被玩家認定其纖薄手機地位！呢款E898睇落以為係一部滑蓋手機，點知佢原來採用TouchScreen操作，今次仲加入快捷功能Icon，讓玩家將經常用嘅分唇放喺Menu首頁，平時篤一下就用得，認真方便！但講到創意，又點夠呢支Stylus咁過癮？喺機身前後，你唔會發現擺放Stylus嘅插槽，皆因佢為咗減輕負擔，已經移師機身以外變身成一條手機繩，仲設計到成支唇膏筆咁，想用嗰陣就要直接拔出嚟用，雖然都算幾方便，但焗住帶手機繩出街唔係人人都鍾意㗎喎！
配搭呢支唇槍嘅就係鏡面靚芒，佢闊度只有2.3"，比起一般2.8"PDA手機嚟講，顯然唔夠揮！但講明為女性而設，減磅固然重要，不過今次仲顧及埋靚芒規格，屏幕支援26萬色及QVGA解像度，畫質都算幾Sharp嗰隻；機身得14.6mm又夠薄，加埋咁有創意嘅唇膏筆設計，唔冧死女都難！
規格：GSM三頻、2.3"輕觸式屏幕、130萬像素相機、EDGE、MicroSD記憶卡
查詢：SAMSUNG（28626001）