唔經唔覺，數碼港落成至今都有4年，但講到推動IT發展，一直都閂埋門搞咁，噚日卒之有大動作，就係同英國文化協會（BC）合辦一連串活動，希望提升香港近年好hit嘅數碼娛樂嘅貢獻。
數碼港行政總裁楊偉雄喺活動揭幕禮話，會同BC喺港英兩地，各選三個年屆21至35歲食腦之人交流實習，出年3月先知邊個係幸運兒，大會仲搵咗《盜墓者羅拉》嘅製作商EidosInteractive幫手揀卒㖭。而活動嘅壓軸好戲，就係下個月嘅animationcamp，楊總仲爆話，製作《海底奇兵》、《反斗奇兵》嘅Pixar，都派動畫大師來港講talk，相信好多動漫迷都勁期待！
楊總又話，本地人才其實唔少，好似創新科技基金舊年投資3000萬元嘅培育計劃，30個受惠名額已滿，數碼港𠵱家正同港府傾緊擴大計劃規模，佢期望今年底前有好消息公布。