本欄九月二十三日寫「大學生唔識賦比興」，內裏提及一本三聯書店出版嘅舊書，就係周錫馥選注嘅《中學生文學精讀：詩經》，一位讀者寫信嚟問此書嘅ISBN號碼，因為佢去三聯書店問，店員話無此書；查作者，搵唔到周錫馥，不得要領。既然讀者有誠意買此書，於是左丁山搵番呢本書出嚟，睇真啲，書嘅ISBN號碼係962．04．1344．X，請呢位讀者再去三聯書店搵過。三聯喺一九九六年出版咗一套《中學生文學精讀》叢書，除上述「詩經」外，還有古文、唐詩、宋詞、李白、魯迅、沈從文、蕭紅、老舍、冰心等，皆由專家選注。
另外一位讀者James來電郵問及十月八日本欄提過一本書嘅英文名字，讀者來郵，往往推動左丁山深入啲查清楚背景資料。查完之後，呢本書嘅英文名字係AllIreallyneedtoknowIlearnedinkindergarten，一九八八年出版，係當年暢銷書，十八年來風行一時，引發好多人寫類似文章，此書淺白易讀，其實只有第一章最多人談論，作者RobertFulghum係美國作家，靠此書大大增加了名氣。
講開舊書，不如講多一本詞選。溫家寶於十月八日會見日本新首相安倍晉三，會議上講：「中國有一句古話，青山遮不住，畢竟東流去」。呢句古語出自南宋詩人辛棄疾之《菩薩蠻．書江西造口壁》，喺屋企睇電視新聞之際，左丁山啱啱讀緊宋詞，立即搵到一本《辛棄疾詞選》（劉斯奮選注，三聯書店一九八六年版，ISBN號碼962．04．0094．1），第十六頁載有此詞：「鬱孤臺下清江水，中間多少行人淚。西北望長安，可憐無數山。青山遮不住，畢竟東流去，江晚正愁余，山深聞鷓鴣。」詞意一片悲情，滿懷憂鬱，不過溫總理飽讀詩書，識得抽出其中兩句──青山遮不住，畢竟東流去──意思係中日關係雖然有重大障礙，但潮流不可抗拒，互相關係點都係向好方面發展。安倍晉三明唔明白呢片苦心呢？