Keyman係「RimiCafe」嘅阿四——除咗入廚乜都要做，沖嘢飲、送食物、喺門口招呼客人全部係佢份內事，之前做Sales嘅佢話：「我原先係呢度熟客，好鍾意呢度嘅環境；咁啱嗰時想轉工，老闆又等人用，咪過嚟幫手囉。做餐廳可以同客人吹吓水，做Sales就唔得喇。」餐廳營業時間係下晝4點至半夜3點，唔辛苦咩？「都辛苦㗎，今日瞓到下晝3點先起身，𠵱家先食第一餐，都唔知係早餐定晚餐，收工後咪去茶餐廳食嘢囉。」
返工時間都幾顛倒，媽咪無鬧咩？「最初都有㗎！驚Cafe開到咁夜，好似Bar咁危險，我有慢慢解釋，後尾佢上嚟巡場，知道係正經地方，咪接受囉。」其實做Cafe都一樣學到嘢：「可以學識同客人打好關係，亦可以學到Serve客技巧。當好多客嗰陣，我哋落單會同佢哋講要等耐啲，安撫客人情緒。」做咗半年，有無熟客攞電話約你去街先？「都有嘅，不過真係好熟好熟先會畀電話囉，反而最驚喜係撞番以前嘅同學。」都好吖，可以識多啲朋友，總好過做Sales企成日吖。
記者：蘇振鵬 攝影：楊錦文
七味明太子釀雞翼$38
雞翼釀入肉碎、明太子，焗完再炸一炸，脹卜卜雞翼帶少少辣，熱辣辣口感唔錯。
酥烤焗青口$34
青口、芝士、蒜頭烤8分鐘，香口惹味。
朱古力西多士$30
玫瑰之戀$45
西多士布滿香濃朱古力醬，甜到漏；食完飲啖充滿玫瑰花香嘅沙冰，中和甜甜嘅朱古力味就啱啱好。
食客評分（10分滿分）
RimiCafe（27712781）
地址：旺角登打士街43H登打士廣場20樓02-05室