罕有辣車：香港都有福特GT　有得睇無得買

上星期經過灣仔福特ShowRoom時見到有個怪現象，人人經過櫥窗時總會企定定駐足幾分鐘，而且視線一致，於是我又八八卦卦睇吓究竟有咩好睇，唔望猶自可，一望即刻唔想走，原來入面擺咗架福GT超級跑車俾人任睇，架車咁搶眼，唔怪得個個眼望望。

全港限6架車未到已售罄

識車之人一定知呢架GT來頭不小，想當年，HenryFordII為製造一架可以在平地賽挑戰法拉利的超級跑車，於是就設計咗一架超級跑車─GT40，就在1966年利曼24小時經典耐力賽中，GT40就一口氣囊括頭三名位置，成為車壇一時佳話。而目下呢架保養得咁新淨嘅福特GT，就係為紀念福特建廠百年而製造嘅現代版GT40賽車，最近呢架傳奇之車之所以會現身香港，因為早前代理特別為本港車主訂購，而上星期剛好最後這架亦運抵香港，於是香港代理就趁啱啱運抵，情商個客借出嚟公諸同好，全港得6架咋，而且晨早已經俾人落晒訂，雖然有得睇無得買，但有得開吓眼界都好，要睇就好趁呢幾日去ShowRoom睇飽佢啦。