巴塞隆拿嘅阿根廷小將美斯得嗰19歲，估唔到佢人仔細細咁識搵錢，原來美斯已經係多間國際品牌嘅代言人，仲要係好鬼出名嗰幾間，好似「M記漢堡包」、「X盒遊戲機」、「三間」及「萬事可樂」等都同佢簽咗長約，擺明想挑戰碧咸同朗拿甸奴嘅地位，成為新一代最搵錢嘅廣告天王。
老實講句，美斯個樣確實冇得同萬人迷比，同朗拿甸奴比又差咁啲招牌笑容，不過我諗美斯應該以cute樣做賣點，加上形像又健康，所以有咁多國際品牌贊助佢。聽講「M記漢堡包」同「佳佳樂飲品」等共7間品牌，只係美斯其中幾間嘅大型贊助公司，其餘仲有啲名氣冇咁大嘅廣告商都未計在內，加加埋埋隨時孭住十幾間公司做代言人，你哋都咪話唔肥仔。
老竇同佢開拓日本市場
錢冇人會嫌多，美斯個老竇佐治美斯見個仔咁有搵錢能力，仲唔嗱嗱臨當佢係搖錢樹咩。我求大俠八到佢正積極幫緊美斯開拓亞洲市場，最近就同幾間嚟自日本嘅贊助商傾緊合約，話唔埋傾掂咗又大賺一筆，唔通佐治美斯同佐治貝斯一樣鍾意飲酒，𠵱家爭緊人酒錢要個仔還債？
美斯現時只得19歲，可謂前途無限，就連廣告界都撈埋直迫碧咸地位，希望佢唔會因為掛住做代言人，捱殘咗影響場上表現啦！
「美斯年紀輕輕就名成利就，比起初出道時嘅碧咸同朗拿甸奴，確實做多咗好多嘢；相信球迷喺未來幾年，都會不停見到美斯喺廣告中出現。」