Ducatisport1000外形參照1973年Ducati750Sport來製作，所以全車都充滿一種獨特的懷舊味道，而最搶眼的地方，莫過於那對連接在把手未端的倒後鏡，極富70年代歐洲風格。此外，在懷舊外表之下，又加入了不少現代的科技和造車藝術，就是這獨特的新舊結合味道，吸引不少愛好電單車的女士們，而Irene就是眾多女鐵騎中的一個。
文：梁家寶
攝影：伍慶泉
狂野外表 一望就想征服
家庭主婦Irene雖然身形嬌小玲瓏，讓你怎樣看也不像一個電單車手，但當她披上戰衣和她的Ducati合二為一時，Irene馬上就變成了專業車手的模樣，不讓男士專美。「我第一眼睇Ducatisport1000就俾佢嘅車形吸引住，好似佢咁充滿懷舊風格嘅車款，都有見過，不過集合咁先進嘅造車科技於一身，我真係第一次見，而Ducati同大部份日本racing車嘅分別在於佢個車架同引擎，引擎外露嘅設計更加令佢充滿一份機械感，所以第一眼我已經決定要征服呢一匹野馬。」
轉向輕巧 一揸即上手
「開始嗰時我老公都有少少反對，佢唔係反對我揸電單車，而係怕我控制唔到，但係當佢了解咗Ducati嘅機車性能，加上見到我可以控制自如之後，佢唔反對之餘仲買埋件原裝Ducatisportclassic皮褸畀我襯車。」Irene憶述第一次坐上去嘅時候，已經覺得佢一啲都唔難操控，轉向好輕巧，基本上想佢點就點，真係估唔到1000c.c.嘅車揸起上嚟可以咁易上手，雖然車身有啲重，要泊窄位嘅時係麻煩少少，但反而咁樣喺道路上安全得多。
懷舊外表×現代科技 獨有歐洲風格
論坐姿，Ducatisport1000係一部運動能手，要舒服那就一定揀綿羊，但對愛揸電單車之人如Irene嚟講，最重要係感覺，「揸電單車係講求享受路面同速度畀唔畀到我快感，我要有一種飛馳同埋自由自在嘅feeling，我覺得咁先至有一種人車合一嘅境界。其實都有朋友問我點解有咁多牌子選擇，淨係鍾意Ducati電單車，唔試吓其他呢？我話因為市面上只有DucatiSportclassic集合咗七十年代風格嘅設計，而又可以提供現代化技術水平，更重要嘅係佢有一種歐洲獨有嘅機車文化散布出嚟，呢種感覺好難用三言兩語表達到，但我敢講只要你一坐上去，就一定返唔到轉頭。」
Ducatisport1000規格表
引擎：四衝風冷V2汽缸Desmodromic4活瓣
馬力：92hp/8,000rpm
扭力：9.3kg-m/6000rpm
傳動系統：亁式多片六前速鏈傳動
售價：$129,900
車輛提供：好運車行有限公司（27084499）
