有冇諗過，如果你係首富李嘉誠，你會點用時間？點先會快樂？喺內地前日（10號）出版嘅《環球企業家》一篇洋洋萬字，題為《你所不知道的李超人》裏面，只得超人三句說話嘅所謂「專訪」，就可以搵到答案！Bytheway，咁都寫到一萬字，執筆嗰位記者大哥，先至係真正超人！
咁「富貴浮雲嘅超人」呢一秒又有咩警世金句處世格言呢？首先，個記者問點解咁多企業家輕易斷送一家企業，但超人幾乎碰不到「天花板」？超人話：「其實好簡單啫，我每日90%以上時間，不是用嚟想今日嘅事情，而係想明年、五年或十年後嘅事情」。
我知足 不表示沒上進
華華提醒平民如你我千祈咪學，就算真係咁諗，都唔好同人（尤其係老細）講，否則應會被斷定為妄想症。華華想問：唔知超人當年穿緊膠花嘅時候，有冇諗過會做地產呢？
咁超人有乜企業家修養？超人話：「我內心已有非常好嘅保障，若一個人唔知足，即使擁有好多財產，都會感到唔安心，舉例講，如果睇住BillGates嘅財富，同自己距離咁大，咁樣你永遠都唔會快樂……重要係內心嘅安靜，表面睇嚟好忙，但內心其實無波動，因為自知做緊乜嘢工作，我知足，但不表示沒有上進心」。
華華就覺得，斷估一個師奶都唔會諗過同BillGates比，咁打工仔表面裏面都其實好忙，每日返工唔知做緊乜，冇乜上進心，但又死唔知足，所以大家無謂細嚼呢句說話！
至於超人點睇命運？佢嘅答案係，「性格才是命運嘅決定因素，好似一條船，因為機器同埋其他設備都係依附喺呢條船裏面」。
計華華話，好多嘢係人定勝天，開唔開心，成唔成功，其實睇自己。超人講過富貴於我如浮雲，其實你同我都有資格講，因為富貴於我同你，真係如浮雲……咁遙遠囉！
後記：究竟超人係咪真係接受過呢本刊物訪問華華唔肯定，但咁就寫咗成萬字，可以證明到：超人喺大陸仲係賣得，仲有讀者想睇。