煲呔噚日公布任內最後一份施政報告，一如所料，為爭取「冧莊」，穩定壓倒一切，反而喺記者會上，回應8號仔單刁最有「含意」──政府唔會介入……呢單純粹係一單商業行為……資產轉手要得到證監公平處理……簡單幾句，完全體現到呢單嘢「的而且確」唔關佢事，仲一定冇官商勾結成份！
佢呢幾句有乜「含意」？首先，上月尾新加坡佬強迫誠實小番薯爆邊個係買家，成個香港嘩然──唔係因為科水5億落定嘅係李超人，而係驚歎點解係人哋政府出聲，唔係由我哋特區政府講，嗰一秒鐘，煲呔已經開始「劣劣哋」，好衰唔衰，先一個星期阿爺仲要整單陳良宇案出嚟以儆效尤，仲放風話關心香港有冇官商勾結，你話係咪嚇死煲呔呢！
講開8號仔單刁，真係冇乜進展，𠵱家個焦點除咗係誠實小番薯籌唔籌到旗之外，仲有係立法會係咪開會研究呢單嘢。中環報料，資訊科技同廣播委員會今日選新主席，現任主席單雞（即係單仲偕）係咪連任，抑或過莊畀副主席大班（即係鄭經翰），將會帶嚟唔同效果咁話，大家不妨拭目以待！