哈動（1133）今年7月頭由9.90元高位跌到上月低位6.09元，以底背馳反彈至7.20元，近幾日有回吐，噚日收6.95元，跌5仙。又見散戶心思思想入市。
喺《香港討論區》入面，網友dcpor向各人徵求意見：「1133上星期由$6.3x上到$7.1x，𠵱家落番$6.9x，入唔入得過？如果睇佢業績真係幾好，又有大行唱目標價$9，各師兄點睇？」
haywingyeah認為現價可以買入，因為東方電機（1072）噚日回升甚多，對哈動應有刺激。佢建議6.50元之下止蝕，目標睇7.80元。
skychan09已經上咗車：「今日入咗貨，等佢7.6左右放。」
ABCgucci亦係捧場客：「我都入咗，幾難得可以等佢剛剛調整呀！呢隻好多時一低位就有人大手買佢喇！」
新政策下大贏家
哈動8月底公布中期業績大升98%，股價卻反覆下跌，主要是投資者擔心電力設備行業難再有大幅發展空間，未來盈利增長將會放緩。事實上，根據「十一五」計劃，國家將以大電廠取締小電廠，並發展非燃煤發電，哈動現正大力發展毛利率較高嘅核電設備業務，將會是「十一五」新電力政策下的贏家之一。
上月荷銀及建華證券發表報告評論哈動，分別給予「買入」股「跑贏大市」評級，目標價分別係9.56元同10蚊，距離現價仲有大把水位。
圖表上，哈動經過上周反彈後，10日線已升穿20日線，現正處旗形整固，可候6.90元吸納，一旦整固完畢，短線上望8.15元，跌穿6.50元止蝕。
余文