香港人買樓，相信十個有九個半都要搵銀行度水至做得業主，但成日就聽到佢哋係咁呻話供得好辛苦，咁有冇法門可以輕鬆自在啲呢？weoneone就聽到個「十三法則」嘅方法，即刻上《香港討論區》去請高人指點一下究竟係乜料。
網友dbp好快好認真詳細咁講解咗呢個法門。
dbp話：「一個比較客觀嘅供樓安全水平......最多供十年，最少畀三成首期，最多供款額為家庭入息的三成」咁啫，仲話呢個係市場智慧。
佢舉埋例，如果借200萬元，利息大約6厘咁計，供10年同供30年比較，利息可以慳到165萬咁多喎。
weoneone聽完當然感激流涕啦，又想知道咁正嘅嘢，究竟出自邊位智者。dbp答得簡單又好cool：「香港討論區」。
揸120%現金先買樓
佢哋對答嘅過程中，都有其他網友搭嗲入嚟吹吓水。
gemoney對法則嘅可行性有質疑：「依你嘅十三法則，一個月入5萬家庭，只可買200萬嘅樓，每月儲2萬，3年後2萬x36個月＝72萬（首期＋裝修＋雜費），借140萬（70%），按揭分10年供（P-3，P＝8.25計），每月供15,020蚊。如果真係咁先買得樓就死得啦，又有幾多家庭做得到呢???」
大熱男唔知係佩服定想暗寸dbp，佢話：「十三法則好！真係唔係人人都可以作個法則出來就得㗎！我都想出個十二法則，要手上有樓價的120%現金先買樓！唔使畀銀行賺息仲夠錢裝修！咁人人都用十二法則，減低樓宇需求，樓價又可以低啲！」