美國餐一向畀人嘅印象係碟大、份量大、銀碼仲大，不過一定飽，價錢同份量永遠成正比，成嚿水喫個漢堡包一啲唔出奇。美式餐廳「T.G.IFridays」今勻名副其實賣大包，11cm高漢堡包無縮水依舊大大個，但玩差不多半價賣$48，主菜20cm長豬肋排照減$60，3款小食更減到$19.9……Sorry呀，我知呢篇唔係開倉稿，但我實在太興奮，呢勻一定要食到捧住肚走。
記者：黃若茵 攝影：譚盈傑
1.星期五漢堡包$48（原價$88）
1.張小姐話：「呢個漢堡包係鎮店之寶，每個月賣過千個。」包身至少11cm高，淨係塊牛肉已經有2cm，差不多成吋厚，一個頂得住M記兩個，仲有大大塊煙肉，餡料咁Full，我唔係扮細食，但一個人真係食唔晒，你呢？
2.炭燒美國豬肋排$78（原價$138）
2.大廚話：「豬肋排以公司秘製醬汁醃足一晚，再用炭火燒，肉汁好豐富。」半排已經有7條骨，我度過，有20cm長，面層燒得香肉質夠腍，唔點醬汁齋食已經好夠味。
3.烤牛鐵塔$98（原價$168）
3.大廚話：「最底層有墨西哥薄餅，中間鐵板有腍身薄烤牛肉同雜椒，面層放沙律同醬汁。」食嗰陣用薄餅包住牛肉，點醬汁同沙律放入口，牛肉鐵板上，趁熱食好Juicy。
4.酥炸洋葱圈$19.9（原價$42）
4.粉漿酥脆，洋葱唔會炸得太熟，Keep到鮮味多汁。我數過，每碟有16個洋葱圈，每個圈直徑起碼有8cm，好大個。師傅話專登揀大大個洋葱做洋葱圈，細嘅，全部用嚟煲湯。
5.水牛城香辣雞翼（6隻）$19.9（原價$62）
5.老實，原價食就貴嘞，玩特價就超抵，每碟6隻雞翼平均每隻$3多，雖然話係香辣雞翼，不過我就食到酸酸哋，另配西芹，美國佬最鍾意點BlueCheese醬食，試吓無妨。
6.星期五雪糕新地$19.9（原價$68）
6.雪糕新地勁大杯，想食記得留肚，一杯3個雪糕球，客人可選呍呢拿或朱古力味，上面加香滑忌廉同杏片，嘩，甜到爆，食完覺得好幸福。
份量大咪單拖幫襯
「T.G.IFridays」全球有450間分店，香港分店開業8年，一直主打美式食物。老實，每次去呢類型美式餐廳，睇親餐牌總會嫌貴，到食物上枱條氣會順番啲，夠大份吖嘛！今勻玩減價包你無投訴，小食$19.9聽落唔係好抵，但諗真原價要$40至$70，計落最勁減到3折，星期五漢堡包都唔弱，原價$88𠵱家賣$48差不多半價，仲要無將價就貨份量大縮水喎。提醒你，咪單拖一個人幫襯，碟碟都咁大，免得你食得呢樣食唔到嗰樣，學市場推廣主任張小姐話齋：「外國人會一人食一份主菜，香港人反而會叫幾個主菜大家Share，每樣食少少仲過癮。」
睇埋裝修，餐廳布置不俗，佔地兩層，樓上位置啱晒開Party。坐低，對眼一定唔會悶，事關牆壁絕對搵唔到空位，掛滿廣告牌、車牌、樂器等數百件懷舊裝飾物，琳瑯滿目睇到人眼花撩亂，加上不斷播放節奏感十足嘅美國流行曲，食得飽之餘，保證你可以同班Friend嘻嘻哈哈Hea番陣。
睇埋裝修
呢個漢堡包值幾錢？
Kit：「我喺加拿大食過咁上下大Size嘅，不過要百幾蚊港紙，呢個包咁大，要$120啦。」
Edmond：「塊牛肉好厚吓喎，仲有煙肉同咁多餡料，睇落咁好味，我諗點都值一嚿水。」
Jeane：「嘩，咁大份夠兩個女仔一齊食喎，我估$50度啦，啱唔啱呀？邊度有得食呀？」
Lina：「見到咁大個有啲肚餓㖭，連埋薯條好似成個餐咁，$60肯唔肯賣畀我呀？」
Junia：「呢個同我喺美國食嘅差唔多喎，都夠我食飽，$60應該買到喇啩？」
搵食攻略
T.G.IFridays（23682800）
地址：尖沙嘴東企業廣場4樓及5樓
營業時間：周日至四11:30am-12:00mn；周五及六11:30am-2:00am
交通：尖東火車站L出口
全店座位：267個，設吧枱
人均消費：$200
最好賣：星期五漢堡包，日賣30多份
優惠期至10月25日