肥姐沈殿霞入院多日，欣宜成日去探佢，加上為新歌拍MV，曝光率自然多咗，就算近日欣宜飛咗去溫哥華幫修身堂新店剪綵，有關佢嘅新聞一樣未停過。最近有雜誌登咗欣宜同張可頤嘅緋聞男友郭慶彬去街街買鞋嘅相，男方仲幫欣宜搞挽鞋㖭。
欣宜飛咗，照顧肥姐嘅重任就交畀佢兩個家姐，前晚一度誤傳肥姐病危，好彩係流料一則。噚日鄭少秋同汪明荃、關菊英及鄭嘉穎等喺尖沙嘴出席《我們的世紀金曲演唱會》記者會，秋官聽到又誤傳肥姐病危，佢話：「唔好成日咒佢啦，大家用念力諗佢健康好過啦。上次欣宜見佢嗰陣精神都好好，又唔使插管，食得瞓得。」
官晶華似雞乸
講到欣宜俾人影到有新男伴，秋官就笑笑口話：「係女仔都要搵男仔錫㗎啦，𠵱家啲少女社交梗有，18歲女冇朋友仔咪好老土？」提到上個禮拜無綫播出欣宜新歌《靠自己》嘅MV片段，事後廣管局竟然接到多宗投訴，秋官話：「我都想個女好似我面皮咁厚，有讚有彈先好，惡意嘅唔使理，善意嘅，改到咪好囉。」
至於老婆官晶華同兩個女最近成為狗仔隊目標，有報道仲話官晶華發惡，秋官就話：「麻鷹捉雞仔咁，有麻鷹嚟，母親梗係照顧雞仔。我啲女好驚呀，車未停就落車，搞到受傷就唔好啦。」噚日秋官接受電台訪問時，仲大講心底話，佢話肥姐今次入院令大家多咗時間相處，傾耐啲又可以講吓個女。
