中糧國際（506）大重組後，噚日一度再升近7蚊，因近兩日大部份證券行都唱好，除咗滙證同大摩分別睇4.55元及5元比較淡之外，其他行都睇到7蚊樓上，當中里昂最樂觀，認為以消費品股估值上限計，最高可睇到9蚊。中糧當炒，隻中盛糧油（1194）都借勢炒高，連續兩日都升逾1成，不過此股年前炒期貨輸得好慘，就算係同業，質素都高低有別。
食品股中仲有一隻民企叫福記食品（1175），日前復牌宣布發行10億元可換股債，今次係繼去年發債集資6億元後另一次大規模集資行動，兩次集資相當於公司市值近四分之一，相當誇張。福記係做餐飲嘅，集資為咗擴大產能，即係建廚房同埋食品加工中心，使唔使用咁多錢，係一個疑問。
福記去年營業額7.96億元人民幣，經營溢利3.08億元，毛利38%，再上一個年度毛利更高，達44%，毛利高得驚人，但現金流卻出現負數2600萬元，為另一疑問，而歐陽風最大疑問，係呢兩大批CB邊啲投資者接咗？
大行美林好少為細公司出報告，但係本周一就突然為自然美（157）發出報告，睇1元，出報告時自然美造0.71元，而噚日最高已見0.91元，話咁快就到價。自然美今年初升勢好勁，3個零月由0.54元升至0.88元，調整一輪又再炒過，但呢架係快車，手慢啲都好難追。
歐陽風