噚日晨早一起身，孫柏文就打電話畀《利字當頭》一欄總舵主利世民兄，希望約佢落茶餐廳，食番個「營養早餐」。點知，世民兄話，要湊女冇得落街，叫我買外賣上佢屋企傾偈算。當我去到佢屋企，世民兄將自己個BB女放喺「電子保姆」──電視機之前，話等個女可以睇TVB節目「交易現場」。世民兄話，佢個女最鍾意睇「交易現場」，不過就唔知點解啲股票報價同埋啲財經口水佬會令個女咁開心。
世民兄喺客廳安頓完個女之後，我就一路喺飯枱食早餐、一路同世民兄傾世界大事。講咗一輪北朝鮮，世民兄話試爆嘅無輻射流出，威力又細，求其去任何國際採礦公司BHPBilliton喺澳洲嘅煤礦，睇下爆石開礦都一樣，何況試爆嘅威力，只係澳洲煤礦平均爆石威力嘅三分之一，所以想講其他話題。咁我哋唔講北朝鮮，就傾下Google用16.5億美金收購YouTube呢單嘢。
陳志雲會唔會轉軚
大家都應該知道YouTube喺畀人分享網上影片嘅網站，早前全城哄動嘅「巴士阿叔」短片，就係喺嗰供人分享。大家都可能知道，YouTube其中一個創辦人，就係從台灣去到花旗國，27歲大嘅SteveChan陳士駿。一傾YouTube，世民兄忽然問我一句：「你話如果陳士駿係香港人，你話佢可唔可以一樣咁成功？」當時我食緊早餐，滿口都係通心粉，不過一聽到個問題，我就好唔小心咁「噴粉」。
我問番佢轉頭：「你話你覺得TVB嘅陳志雲，有冇機會向因為用Bittorrent同人分享影片、繼而被人繩之於法嘅「古惑天王」講以下嘅一句？「我哋𠵱家覺得，其實啲「片」因為用呢個渠道增加曝光率，都係對TVB新聞台同TVB電視台有好處，睇番轉頭，我哋應該一早擁抱呢個渠道帶來嘅曝光機會，擁抱呢個渠道，為TVB帶來嘅社會注視，而唔係眼光狹窄、反射式咁大叫「仲畀人下載？」
曾蔭權搞到個女喊
我問完之後，輪到世民兄「噴粉」。佢話：「電視台高層，冇一個明白新傳播渠道對佢哋嘅影響，淨係識話「有人侵犯知識產權」，叫個「好顧及國際形象」嘅政府「封艇拉人」，啲電視台遲早執笠。」
我話：「冇錯！頭先嗰句真係唔係陳志雲講「古惑天王」，不過係花旗國哥倫比亞電視台CBS高層SeanMcManus講YouTube。所以，就算「古惑天王」同陳士駿做嘅係一樣，一個就要坐3個月監，另一個就可以27歲白手搵超過10億港元。」
世民兄跟住就一路抹枱一路問：「孫柏文你都仲未答我，政府會唔會學咗教訓，畀機會好似「古惑天王」同陳士駿呢啲後生仔發圍？」講到呢度，我哋就聽到世民兄個女，望住過電視開始喊，原來，曾蔭權特首開始講佢嘅「施政報告」。我就望住曾特首咁答：「唔好話容許盜版，如果姦淫擄掠、偷呃拐騙有八百特權人嘅支持，曾特首會好「務實進取」咁即刻去做！」