上網成日都見到有人話，香港呢樣唔掂嗰樣唔掂，有啲激動得滯，甚至講到香港唔住得人，之但係，原來有好多外地人，都不知幾咁想嚟香港搵食，入境處話，由6月28號開始接受申請嘅「優秀人才入境計劃」，截至29號，已經有379個申請，查詢更多達2356個。
適逢噚日份施政報告亦有講及人才流動話題，美聯移民顧問行政總裁吉安，亦乘機畀吓意見，佢話，政府多個移民計劃，都應該增加審批資格透明度，而基於查詢者眾，入境限額亦應該放寬以應需求。
面對大批外來人才，本地薑唔可以再單靠先天優勢而自滿，不斷提升自己無可避免，其中一種方法自然係持續進修讀書去也。美聯工商舖行政總裁黃子華，上個月去咗北京清華大學，讀咗個為期5日嘅「中國管理高級研修證書課程」，仲攞埋沙紙㖭。聽講，佢𠵱家亦讀緊維珍尼亞大學MBA，出年畢業，果然好學不倦。
不進則退，呢個形勢好明顯，大家仲想喺香港繼續搵食，就要醒目同努力啲嘞。
電郵地址：[email protected]