前晚同「洵魚」去銅鑼灣一間日本餐館食飯，當日本師傅送上一碟秋刀魚，「洵魚」癲咗咁大嗌：「好肥美呀！」就不顧儀態咁起筷。說時遲那時快，以「論盡」稱霸OL界嘅「洵魚」又出醜，佢件原本好飄逸嘅雪白恤衫，俾佢一個批踭打翻嘅豉油，搞到變咗水墨畫，襟前一撻豉油迹。(T_T)
當時場面幾咁混亂，但個女侍應好鎮定咁走埋嚟：「等我幫你。」然後請咗「洵魚」去休息室，唔使佢喺舖面獻世。「佢哋都無符㗎啦。」「洵魚」好細聲咁同我講。
侍應攞住啲食炸物常見嘅蘿蔔茸出嚟，好似做面膜咁塗喺豉油迹上面。過咗一陣，侍應抹走啲蘿蔔茸，「真係無晒啲豉油迹呀！」我哋見到件變番雪白嘅恤衫都大叫。\(^o^)/
個女侍應話，蘿蔔茸好吸水，呢個方法萬試萬靈。佢仲攞個風筒出嚟吹乾佢件衫。我哋問點解會有風筒嘅，佢笑笑口話成日有客搞到件衫有豉油迹。「洵魚」就好尷尬咁以笑遮醜。p(^-^)
逄周一至周四刊出