在港因為「巴士阿叔」而聲名大噪嘅免費影像分享網站YouTube，啱啱俾搜尋網站一哥Google垂青，願意一擲16.5億美元（約128億港元）買起，再度成為市場焦點。儘管有唔少批評YouTube未必值得以巨額收購，因為呢個網站內容可能會令Google面對龐大侵權訴訟而蒙損，但仍有唔少網民大讚是次「聯婚」乃天作之合。
網友Sitarix認為，是次併購有助Google喺影像服務方面，奠定舉足輕重地位。有關併購消息傳出後，Google股價上周累計大升4.6%，市值增加近41億美元，已先贏一仗﹗
另外，有網友pavera附和說，Google是靠網上廣告發圍，而YouTube則有一大班忠實擁躉支持，點擊率高，Google只需要在每段短片播放前後加插廣告，便已財源滾滾來。
莫欺少年窮
新嘅成功方程式可以好簡單：只要懂創製人氣旺盛網站或相關服務，唔難獲巨企如Google、Yahoo!或MSN點石成金！網友StockRing表示，YouTube獲巨額收購證明創意絕對有「錢途」，為年輕人重燃希望。
事實上，YouTube兩位創辦人只有二十多歲，其中陳士駿原本係一個負債嘅失業漢，最終能夠靠食腦變身企業家，拼出頭頂一片天，真是「莫欺少年窮」﹗