翻查往績，嚟緊星期六、日將會係4大聯賽強隊嘅「大凶」日子，皆因近年國際賽後的10月中旬賽序，爆冷戰果頻生（見附表）。國際賽戰鼓聲罷，列強主將消耗不少，想阻止「大凶」日子吹「冷」風，靠晒幾位救兵。
文：藍鑽石
近年，英超聯強隊喺「大凶」日子最當衰。前季，車路士作客敗走曼城，係牙擦領隊摩連奴領軍後第1次輸波；去季同期，車路士對保頓一開波就被敵將簡拿高普路斯轟入1球，半場落後0:1、球員返更衣室俾摩帥鬧醒先至知死，到下半場上演一幕「天下圍攻」反勝五個一皮，總之令捧場客一度驚餐死。當日「車仔」唔爆，同市宿敵阿仙奴就以1:2輸俾西布朗，爆個大冷W，唔到你唔信邪。
曼聯回落靠沙夏拔「根」
今輪英超聯所有好戲碼，都喺禮拜六上演，「晚飯場」曼聯作客韋根。紅魔雖然繼續排榜首，但近期鋒芒明顯唔及季初，入球數目減產，呢層肯定同朗尼腳風唔順有關。好彩，法國前鋒沙夏呢場波有望復出，斷估曼聯唔使好似上場對紐卡素咁，吓吓靠老將蘇斯克查數糊。坦白講，呢位超齡娃娃臉殺手唔會次次咁好彩，個波總係落到佢腳下，或者省中佢改變方向入網咁筍。
韋根今季成績麻麻，但擺明爛打，暫時主場都叫保得住不敗身；講到攤路，呢隊波今季計聯賽同埋盃賽未試過連敗，知恥近乎勇，今次再遇曼聯就算報唔到上屆聯賽盃決賽一箭之仇，都唔會畀紅魔好過。仲記得上季聯賽韋根主場鬥曼聯，都係因占邦達完場前「擺烏龍」，至僅輸俾曼聯1:2嗎？
沙夏復出轟韋根
韋根vs曼聯
時間：香港時間周六7:45pm
直播：有線63及64台