講西甲聯，個個禮拜無論有冇直播睇都係講皇家馬德里、巴塞隆拿。近年西甲聯喺「大凶」日子爆冷場次少，而皇家馬德里今個禮拜六征基達菲，係同市大大佬蝦細細佬，強弱懸殊冇得打。皇馬多咗施仙奴呢個傷兵之後，後防兵源其實唔多夠，不過球迷最關心都係隊波嘅前線組合。收到風，「大哨」朗拿度近日晚晚跑步操弗自己，咁有誠意，話唔定有機會搶番個正選位。
沙維奧拿有機倒戈
巴塞隆拿今輪迎擊西維爾，一隊係上屆歐冠盃冠軍，一隊係歐洲足協盃冠軍，季前西維爾就喺歐洲超級盃贈巴塞3蛋，夠晒激。巴塞前鋒伊度奧缺陣，教練列卡特如果想復仇，不妨考慮用沙維奧拿，話晒倒戈球員成日有料到。講番「細哨」朗拿甸奴，雖然踢完國際賽仲係鬧入球荒，但寓賽於操後狀態唔差得去邊。
皇馬用「大哨」大蝦細？
基達菲vs皇家馬德里
時間：香港時間周日2:00am
直播：有線61台