中汽資源（729）獲日資AssetManagersFund入股後，今年6月宣布供股，1供1，供股價0.12元。通告講明有意透過供股增持股份，殊不知幾乎所有股東都願意供股，包括由現管理層持有嘅StarMetro及中信集團，供股後分別維持19.77%及10.03%權益，至於日資大股東，只係由19.68%增加至22.30%。
出動到供股都冇辦法收番啲貨源，市傳大股東正尋求多個方法增持權益，由於第3大股東中信集團入股成本成1蚊樓上，要佢割愛似乎唔係咁易，日本仔𠵱家正向Metro及公眾人士埋手增持，噚日中汽股價急升17.7%，而大股東噚日披露於上周五增持400萬股，平均價0.199元，據聞增持行動未完。
中汽前身係巨川集團，生產汽車天線與相關零件，經多次重組後，最新業務係產銷汽車零件，另今年初收購進匯證券，實行雙線發展。至於中汽大股東日資亞盛亞洲母公司為日本上市的HERCULES集團，主要從事房地產投資、商人銀行、資產管理、酒店等業務。
中民燃氣（681）噚日復牌，宣布以合共約2億元代價，收購福建省嘅燃氣項目，福建係沿海富庶省分之一，呢個項目規模亦唔細，但係中民股價表現就有啲「雷聲大雨點小」之感，股價升上0.425元後跌回0.4元收，僅升5.2%。睇番呢間燃氣公司，原來個名叫做安然，同美國執咗嗰間Enron譯名一樣，真係畀佢嚇一跳。
歐陽風