以前，喺花旗國紐約時代廣場範圍內，其中一幢大廈嘅外牆，有一個非常特別嘅廣告牌。呢個廣告牌特別嘅原因，係因為租呢個廣告牌嘅人（名叫SeymourDurst），冇用呢個廣告牌賣任何產品、服務嘅廣告，而係將一個好似大家屋企裏面都有，用來計算屋企用咗幾多水喉水嘅「水表」放上去。
呢個掛喺時代廣場嘅「水表」，就有一個好大嘅「計算數字顯示器」，有13個位咁大，最大可顯示嘅數字可以去到9,999,999,999,999，即係話10萬億減1。大家可能會問：「究竟數啲乜要用到有13個位嘅顯示器？生物學家估計全球有嘅曱甴數量？定係天文學家用太空望遠鏡望到嘅星星？」兩個都估錯，其實呢個13個位嘅「水表」，數嘅係花旗國國債總數。
去到九十年代中，好多擔心花旗國政府財政狀況嘅有心人，都好鍾意走到呢個「國債水表」前，去提醒自己情況有幾嚴峻。不過到千禧年，因為有一浪接一浪，花旗國股市泡沫帶來嘅「資產增值稅」capitalgainstax稅收，花旗國聯邦政府亦毋須要再繼續放債、借錢去維持每年開支，甚至乎可以開始還錢，所以花旗國國債總數亦隨之而下。當時租廣告位掛呢個「國債水表」嘅家族，就好開心見到政府卒之撥亂反正，唔再借錢，覺得「國債水表」已經達到成效，所以就拆咗呢個紀錄花旗國國債總數嘅「水表」。
都唔知係唔係因為冇咗呢個「水表」警惕，花旗國聯邦政府又開始毫無責任咁亂使錢。當然，因稅收有限，所以花旗國政府又再次踏上放債、借錢之路。到2003年，原先掛開呢個「國債水表」嘅家族覺得政府借貸又開始失控，所以將「國債水表」復活。原本喺千禧年，「國債水表」第一次退休嘅一刻，花旗國國債總數都未超越5萬億，不過以今時今日花旗國政府開支預算，到出年07年，呢個有13個位嘅「國債水表」，就會面臨淘汰嘅厄運，因為到時候，花旗國國債總數就會超越10萬億，13個位都唔夠用。
《蘋果》網站監察政府
不過，同一個普通人講「10萬億」呢啲名副其實嘅「天文數字」，好難會產生共鳴，更加唔會產生恐懼。不過如果同你講，今年花旗國人口就會啱啱到3億，即係話，不論係BB或退休人士，印第安人或新移民，蓋茨或攞綜援，每一個花旗國人都要負3.3萬美元嘅債，相等於超過25萬港紙。就算今時今日在生嘅花旗國人還唔到，佢哋嘅仔、女、孫都要還，呢個就係花旗國政府送畀下一代嘅「大禮」。
當然，孫柏文都唔想見到我哋特區政府，學花旗國政府一樣送啲咁嘅「大禮」畀下一代，所以我都好想見到類似警惕市民嘅「政府使錢水表」出現。好彩，今時今日真係有咁樣嘅「政府使錢水表」。如果大家去過《蘋果日報》網站，喺右上角就會見到我哋特區「政府使錢水表」，大家不妨去睇睇。不過我要警告大家，如果你有心臟病或高血壓，為了自己健康着想，就應該盡量避免睇呢個「使錢水表」喇！