論吸引力，「雙十」也好，台灣天下圍攻也好，對香港人嚟講，以上兩者都冇我哋前宗主國英格蘭周三歐洲國家盃外圍賽作客對克羅地亞咁吸引！
「差劣傳送、差劣走位、差劣射門，同埋無鬥心！」以上係英格蘭領隊麥卡倫，喺上周六賽和馬其頓後發表嘅言論。英格蘭真係太不濟，嚟緊仲要有中場謝拉特停賽嘅情況下作客克羅地亞，呢次英格蘭真係死得！
朗尼無態唔識入波
馬其頓成功地死守英格蘭，順利攞到1分。作為「大佬」嘅克羅地亞睇到，當然軍心大振！個個球員都可能會咁諗：「英格蘭踢成咁！我哋響薩格勒布將會報番兩年前輸2:4之仇，雖然近10年3次交手都未贏過，不過，我哋有信心贏波！加上英格蘭前鋒唔識入波，連最有威力嘅朗尼都無態，各位兄弟放心啦！」小弟亦深信，以英軍對馬其頓的表現，作客對克軍無可能贏波，大家可以放心捧克軍！
上一輪嘅歐國盃外圍賽，畀我最深刻當然係保加利亞，而馬田柏度夫表現最搶鏡；至於蘇格蘭同瑞典分別KO法國同埋西班牙亦以近似嘅踢法！大家不妨多啲留意以上3隊波未來幾場嘅走勢，可能會為大家繼續帶嚟驚喜！
周鵬
商業1台《球迷集中贏》主持
電郵：[email protected]