周中歐洲國家盃外圍賽戰火續燃，今日揀選兩場我哋有線有直播嘅賽事作為推介。
首先係克羅地亞對英格蘭。雖然克羅地亞上場主場大數安道爾7:0，但贏嘅只係魚腩部隊，唔係好夠說服力。克羅地亞𠵱家只屬歐洲2線球隊，已無復當年勇，喺國際賽表現都係一般。
好在英格蘭都唔係好穩定，主場對住實力不及克羅地亞嘅另一支巴爾幹半島球隊馬其頓，都只能0:0和波收場。幸好後防線交足功課，至今仍保持不失球，今場作客同樣未失過波嘅克羅地亞，睇嚟和波各得1分，對雙方都有好處，咁一於揀和波啦。
意大利客W冇難度
另一場就係格魯吉亞對意大利。睇過格魯吉亞嘅波，略嫌整體踢法單調，組織力麻麻，要喺強手林立嘅B組突圍而出，實在困難。面對弱旅法羅群島就綽綽有餘，今場對住實力強勁嘅意大利，輸波似乎已經係必然嘅結局。
雖然意大利頭兩輪先後賽和立陶宛同輸畀法國，好彩上場終於「開齋」，主場以2:0擊敗烏克蘭。兩隊整體實力有一段距離，意大利只要演出對辦，作客贏波冇難度，客W，我今次撐硬你！
阿鵬
有線球彩台主持
電郵：[email protected]