公立醫院醫生追工時補水事件踏入高潮，醫管局拋出六億幾賠畀醫生，補償以前佢哋喺法定假期返工，醫生就要簽番張同意書畀HA，承諾收咗錢單嘢就一筆勾消，仲有一個星期就截止嘞。
不過，好似𠵱家唔係好多醫生覆咗，HA當然好緊張啦。八方喺醫生網頁睇到篇叫「阿流日記」嘅貼文，一連兩日講呢單嘢，唔知呢個「阿流」係咪告HA嘅靈魂人物──梁家騮呢？
八方問佢，佢懶神秘：「係唔係我？heehee……乜都好啦。」以梁醫生咁聰明，又時時話自己要「低調啲」，佢梗係唔會直認呢個阿流係佢啦。喺篇文裏面，「阿流」好深入淺出咁講咗點解醫生要告HA，仲講埋歷史，話六幾年已經有醫生投訴工時太長，89年楊永強同何兆煒兩個前高層仲搞工業行動㖭。
究竟醫生喺限期前簽唔簽好？阿流喺日記度叫同事稍安無躁，幾多號覆都好，因為HA啲錢已經預咗喺度。其實𠵱家咁興寫blog，八方建議梁醫生開個網誌，同大家分享吓佢嘅感受都好吖。