近年落成嘅新樓，雖則愈來愈靚、愈來愈豪華，但偏偏地方就愈來愈「唔見使」，10幾20年前有層600呎嘅樓，一家四口經已住得好舒服，但𠵱家600呎嘅樓，住兩口子就勉強可以，住多個都好擠迫。喺《香港討論區》，小業主講起呢個話題，大家都感同身受，有人仲認為發展商「呃秤」之餘，亦用「建築面積」、「實用面積」、「實用率」呢啲字眼嚟混淆視聽。
字眼混淆 網民促立例
Oscar指出︰「都唔知由幾時開始，啲無良發展商就以咁嘅標準賣樓，話就話有八成實用，其實佢哋打漏咗兩隻字，係『八成再八成』至啱。一早就應該立例執番正個售樓面積定義啦！」
kingcord亦都好唔忿氣咁話︰「明明畀錢買600呎樓，淨係得400呎畀我住，嗰200呎我冇自主權但要畀錢！」
網友ractisbb更加形容發展商的賣樓手法似賊︰「一呎執幾千，好過打劫。」
記者請教過工程監督詹濟南，佢話𠵱家發展商用建築面積或可售樓面面積嚟賣樓，其實都係搵老襯，好多小業主根本唔知「面積」係點計出嚟，事實上，有啲設施、地方，小業主根本永遠用唔着，但都納入為面積一部份，計入樓價，好唔公道。
詹濟南舉例，最近睇過西灣河一個新樓盤，單位建築面積676呎，實用率78%，報稱實用面積有527呎，但佢實地量度過，扣除所有牆壁厚度同柱位所佔嘅面積，單位可用面積實際只係得450呎，可用率67%。所以，佢認為發展商應該增加透明度，公布埋單位嘅可用面積，等小業主心中有數。
消委會發言人亦承認，近年發展商計算實用面積嘅方法，同當年業界共同訂立嘅準則「有些少改變」，例如以往窗台係不納入實用面積，但𠵱家就隨個別發展商演繹。發言人呼籲發展商應該發放多啲資料畀買家參考，而消費者自己亦要睇清楚、問清楚。