咪以為鍵盤同滑鼠畀Microsoft同Logitec玩晒，其實水牛牌（Buffalo）一樣咁出名，近日仲喺日本推出一款鍵盤連網絡電話嘅USB周邊，呢款BKBU-SKJ109/SV最大特色係配置一個IPPhone，用作連接愈嚟愈多人玩嘅Skype網絡通話，唔單只電腦對電腦傾長途完全免費，就算打去外地朋友嘅手機或固網電話，收費都只係港幣毫幾子，同IDD比分分鐘平幾十倍！
另外其他快捷鍵亦一應俱備，如上網、電郵、播放、音量等多媒體按掣都有，大大簡化操作電腦嘅步驟，而且BKBU-SKJ109/SV整體賣相都幾靚，不過體積相對都唔細，電腦枱細啲都擺唔落，最大問題係鍵盤以日文配置，港人未必啱用，希望有其他代理可「參考」呢個組合，推出中文標準嘅鍵盤啦。
記者：徐影龍