財委會選主席爆出親政府陣營有四個無間道，中方都好關注，自由黨田北俊話事後西環（即係中聯辦）都有打電話畀佢，問清楚究竟發生咩事。田少咪講番佢哋投晒畀民建聯陳鑑林，冇倒戈投畀卿姐。反而特區政府至今都冇人為呢單嘢向佢打探消息，莫非有煲呔針就掂晒？
財委會之後，規劃地政panel主席選舉都好激烈。雖然泛聯盟口口聲聲話協調之後，應該會由劉秀成做主席，但田少記得呢個會係冇協調嘅，劉皇發會繼續去選，自由黨仲加多三個人入去撐發叔㖭。但泛聯盟都唔輸蝕，入多兩個，最終係五鬥五。之不過，田少對發叔好有信心，相信佢會掂喎。
至於政制panel，佢哋會支持泛聯盟呂明華繼續做主席、民建聯譚耀宗做副主席。田少仲笑笑口話，呢期咁多是非，到時自由黨可能考慮缺席唔投票，費時走咗一票又話佢哋唔支持泛聯盟喎。