司徒瑞祈花名阿水，同方力申一樣都係香港泳隊一名猛將，朝氣勃勃畀人好陽光嘅感覺。不過估唔到，佢鍾意食嘅嘢都同水有關：「我最鍾意食魚，乜魚都鍾意食，西班牙近海，唔少菜式都有魚食，啱晒我。」一味水蛇春咁長薄荷葡萄亁松子仁焗沙甸魚，佢好Buy：「睇嘢咪咁表面，賣相係一嚿嚿咗啲，不過真係超甘香……」
記者：蘇振鵬 攝影：陳陶鈞
自細鍾意食魚
阿水對魚好狂熱：「細細個就好鍾意食魚㗎喇，以前阿媽煲麥皮都會加魚片，我唔怕骨，無論係中式、西式、日式，總之係魚我就啱，要揀最鍾意食嘅魚，我會揀鱔。」未入行前，佢代表過香港去外國參賽，試過唔少國家美食，仲食得好蠱惑㖭，「都係㗎，法國、西班牙菜好靚好精緻，不過上菜時間好慢，運動員趕住醫肚嘛，邊有時間慢慢歎，咪個個爭住食囉。法國餐有麵包，但只有早餐先派牛油，記得我早午晚三餐都坐同一張枱，所以咪偷偷哋收埋啲牛油喺枱底，等上菜嗰陣偷偷搽麵包食住先囉。」
西班牙出名食海鮮菜
適逢西班牙國慶月，阿水推介「Madison's」，佢拎住刀刀叉叉講：「香港有度好，食歐洲菜唔使嘥好耐時間等上菜，香港人繁忙吖嘛。我有幫襯過『Madison's』，水準唔錯，今日試過焗沙甸魚、鱈魚卷同炸吞拿魚，好啱胃口呀。」呢個時候，總廚Ringo賣花讚花香：「西班牙沿海一帶海產魚穫好豐富，所以有唔少海鮮菜，我哋食材由外地入口，堅持西班牙正宗傳統製法，保證食到真正地中海風味。」10月19日，餐廳仲會推出配合西班牙餐酒嘅WineDinner，10月21日更加有Flamenco舞蹈助慶，有心體驗西班牙飲食文化，記得留意喇。
薄荷葡萄亁松子仁焗沙甸魚$55
阿水：「睇落無乜特別，實則沙甸魚用Sherry酒調味，再釀入薄荷葉、提子亁、松子仁、欖仁加橄欖油焗15分鐘，入口超甘香。」
香炸鹹鱈魚卷$70
製法繁複，醃過嘅鱈魚浸24小時水變軟身，之後烚腍、拆骨、起肉，然後加入洋葱、牛油、麵粉、甜紅椒炸番硬身，正。
阿水食相
Sorry，我少睇電視，又鍾意睇女多過睇仔，真心話，唔多熟識阿水，估唔到佢咁受歡迎。採訪正值落場時間，餐廳無客，試位影相嗰陣，無端端飄出兩位落場侍應小妹妹，爭住影相留念，完全唔理攝影哥哥嘅說話：「影緊相，唔該借借……」、「阿妹妹，等陣先影得唔得？」仲全程望住阿水試食㖭。
1.香炸吞拿魚金磚（b頭盤）
做法同鹹鱈魚卷差唔多，分別在炸嗰陣無加甜紅椒，免甜紅椒味道過份搶，掩蓋吞拿魚嘅鮮味，入口亁身勁香。
2.水手式白酒香蒜炒蜆$60
阿水：「望落似大牌檔油鹽水蜆，實則大蒜、蒜頭、香腸、大蜆用白酒爆香過，再用雞湯煮成，蜆鮮甜香腸辣辣哋，唔錯。」
3.鮮紅番茄凍湯（a頭盤）
燒過嘅番茄、芹菜、洋葱攪碎加茄汁再雪凍而成，工序繁複。阿水：「好濃番茄同芹菜味，飲落似雜菜湯，但更惹味。」
食客有Say
Man
「嚿鱈魚幾重牛油味，好甘香，炸粉都啱啱好。」
Jerry
「啱啱食咗粒卡拉馬塔橄欖，好重橄欖味。」
搵食攻略
Madison's（25234772）
地址：中環夏愨道10號和記大廈地舖
交通：中環地鐵站J3出口
營業時間：周一至五12:00nn-12:00mn，周六及日11:00am-11:30pm
座位：約120個
註：套餐收費
a.西班牙晚餐包2頭盤、2主菜、1甜品及1飲品，每2位$588，供應期即日至10月21日
b.FlamencoFiesta套餐包2頭盤、3主菜、1甜品及餐酒3選1，每位$698，供應期10月21日