不是每個人都有後着，冇煙食，牛棚書院院長梁文道本來以為可以浪漫地避走法國，誰知文化之都亦於明年2月起禁煙，令這位愛煙讀書人無話可說，惟有「好冇型地」在牛棚門口放一張書枱、擺一張摺椅，自設吸煙區。
「我平時慣咗喺coffeeshop（咖啡店）食煙趕稿，唔食煙寫唔到嘢，第日都可以坐公園嘅，唔係喎，公園又好似唔得，算啦，唉，都係返屋企。」他笑言，作為煙民，這些年來飽受歧視，「其實呢幾年都係咁，食煙好似好罪惡，令我喪失好多機會，甚至工作機會，有時離遠喺街頭食，都唔打擾人，都俾人用異樣目光對待，要發配邊疆咁滯。」
他已經準備改變生活習慣，例如改去有露天座位的餐廳，「酒吧都唔會去㗎喇，唔食得煙我不如留喺屋企飲，禁煙係世界大勢，連法國都係咁做，我都冇嘢好講，以為嗰度係吸煙者嘅最後樂園，真係唔使旨意喇！惟有將張書枱搬出去，展覽畀人睇我食煙啦。」
「政府似共產黨」
梁文道批評政府及立法會議員有濃厚的家長心態，先禁非法賭波，後禁吸煙，「好似共產黨咁，人民嘅利益只有我知道，人民自己就唔知嘅，所以人民就要聽我話，政府鍾意乜都管，啲食肆員工話：『冇所謂，我都好鍾意食煙㗎！』你就夾硬講：『你口嗰句話鍾意食煙，真心係唔鍾意。』」
他認為條例對低下勞動階層影響最大，「其實佢哋係最慘，佢哋通常（飲食）口味重，要食支煙當紓緩、休閒，得嗰半個鐘食晏，都冇辦法食支煙，但係啲大老闆、白領依然會有地方食雪茄。」