人始終係感情動物，無論有幾理智，當有突發嘅事情，都會感性一啲，情緒超越咗理智，對事情嘅判斷好多時都冇平時咁醒，北韓核試又係一個好例子。前日個市大陰燭跌咗落嚟，好多股民變得六神無主，但係插個市落嚟嘅正正就係最驚嗰班，美股同日股冇受影響，港股昨日大舉反撲，班股民嘅信心又即時返晒嚟，其實呢啲情況都係不斷重複，大家都應該檢討吓第日應該點樣改善。
恒指升番上17820樓上收市，但係成交下跌到不足300億，仲係等緊消息突破，之不過啲國企股就成交大增，走勢好好，班大戶同炒家想搞邊科已經好清楚。
交行C輪4992：招行（3968）掛牌前，隻交行（3328）破位炒上，𠵱家隻工行招股，隻交行又推高，喺5.60至5.72元橫行咗好多個交易日，昨日大成交向上突破，高收5.80元，係時候試6元關嘞，破咗位應該好快試6.30元。
隻交行C輪4992昨日收1.01元，槓桿率5.7倍，對沖值喺0.9以上，幾乎正股升幾多佢就升幾多，仲有66日先到期，溢價0.3%，一啲都唔貴，呢個價買，正股升上6元及6.30元，4992應該會見1.20元同1.50元，正股跌穿5.60元止蝕。
國壽C輪2464：國壽（2628）回氣後又炒過，昨日企係15.96元收市，升2.5%，成交增加番好多，如果成交keep住升推個股價上16.10元樓上，應該可以突破之前個高位16.82元，正股升到呢個位，隻C輪2464應該會喺1.80元樓上，2464嘅行使價係16元，正股升多幾格就轉入價內，到時升勢會加快，以正股價15.60元做止蝕位。
俊 樺