唔講唔知，喺各界支持下，渣打關懷視障嘅全球籌款項目「看得見的希望」，過去3年，喺大中華地區一共籌到百萬美金，全球計更籌到380萬美金，都幾厲害！為咗隆重其事，渣打今個星期四公布呢個驕人成績。
為咗進一步宣揚「世界視覺日」，佢哋仲搵埋自己個「優先學子」兼青少年發明家陳易希，公布佢嘅最新發明！咁發明啲乜呢？渣打發言人話要賣吓關子，只肯講係一部機，總之到時係會搵奧運金牌失明跑手尹約基（HenryWanyoike）、渣打香港兩個高層馮隆春同埋洪丕正一齊試用……照華華估，個發明應該係為尹約基而造嘅，仲應該係可以幫到佢跑馬拉松嘅儀器……咁到時佢個導跑員兼死黨基賓拿（JosephKibunja）咪冇得撈！